Xitichi xa vaaki xa radio, GCR 106 FM, xi endla matimu

Xitichi xa vaaki xa radio, GCR 106 FM, xi endla matimu eka madyambu ya Muqivela (15 June 2019) laha a xi nyika masagwadi eka swiyimbeleri swa vunanga bya Xitsonga (#XCMA1) eholweni ya vaaki ya Giyani.

 

Tirho wu sungurile hi Ravuntlhanu eGiyani Multi-purpose centre laha a kuri na Gala dinner laha aku simekiwa tirho-nkulu wa masagwadi tlhelo ku tlangeriwa ntlhanu wa malembe GCR 106 FM yi ri emoyeni. Eka ntirho lowu hi vonile vahaxi na vafambisi va xitichi lava nga sungula na xona hi 2014 va xiximiwa hi masagwadi yova khensa. Vanhu lava ku katsiwa Mafosi, Guyu wa Maxakadzi, mufambisi wa minongonoko tatana Khosa, mufambisi wa xitichi tatana Chabane na van’wani.

 

Hi siku-nkulu ra Muqivela holo ya vaaki ya Giyani a yi tele hi nomo laha vanhu a va tile ku ta va timbhoni eka matimu lawa ya nga endliwa hi xitichi xa GCR fm. A kuri siku ro sungula eGiyani hi vona ntirho wo saseka hi ndlela leyi, laha xin’wani na xin’wani a xi endliwile hi maendlelo ya masiku lawa ya ‘digital”, kusuka eka xiteji kufika eka tikhamera.

 

Hi vonile swiyimbeleri swi nyikiwa masagwadi eka swiyenge swo hambana hambana ku ya hi laha swinga vhotiwa hikona hi va yingiseri. Mr. Post u amukerile sagwadi ra yena ro sungula eka vutomi bya yena kunga ‘best Xitsonga male artist of the year”, N’wana Joyce u kumile sagwadi ra “remix of the year”, Simfree u fambile na ‘best Xitsonga hip-hop.IMG_20190615_190314

Pst Rudolph blessing the occasion at the beginning of the event

 

Hi vonile na swiyimbeleri swa khale leswi nga xiximiwa hi sagwadi ra ‘Best Xitsonga Lengend/Life Achievement Award: M.G. Ntlemo, MJ The Man Xivavula na Peter Hlungwani.

Van’wani lava nga xiximiwa hi masagwadi vakatsa Joe Shirimane, Sunglen Chabalala, Dingan David Mathebula na van’wani vo tala.

Xirimela Crew yi burisanile na mufambisi wa minongonoko eka GCR 106 FM, Tatana Khosa “Tani hi leswi ku nga ntirho wo xixima swiyimbeleri swa hina swa Xitsonga hi tekile xiboho xo rhamba ntsena swiyimbeleri swa Xitsonga ku ta nyanyula ntshungu na ku amukela masagwadi” ku vula Khosa. Ntirho lowu awu katekisiwile hi vukona bya vanhu va swiyimo swo hambana hambana: va n’wa tipolotiki kusuka eka Greater Giyani Municipality, hofisi ya MEC wa Mintlangu, Vutshila na Ndhavuko, Ndhavezitha Mukhomi, Ndhavezitha N’wa Dzekudzeku, va n’wa Mabindzi kusuka eka Collins Chabane Chamber of Business lava ava yimeriwile hi Tatana Albert Jeleni, Mala FM 101, Segosese FM, Xirimnela Crew, Ndheko TV, swiyimbeleri swa ndhuma laha kutsaka H.W. Makhubele, Dr. Thomas Chauke, Vuyelwa, George Ntlemo, Pst Rudolph, Mayanda, Solly Makamu loyi akuri mufambisi wa ntirho na van’wani.

 

Hi ku gimeta, mufambisi tlhelo musunguri wa xitichi xa GCR 106 FM, Tatana Chabane u vulavurile hiku tsaka “Ni khensa hinkwavo lava nga pfuneta ku humelerisa ntirho lowu. Ni khensa na dyangu wa mina lowu nga ni seketela swinga olovi. Swiyimbeleri leswi nga xiximiwa hi masagwadi swi vhotiwile hi vayingiseri na swona loko minga eneriseki ma pfumeleriwa kuta vona ti SMS leti nga tirha ku vhota” ku gimeta Chabane.

 

By Xirimela Crew

Be the first to comment

Leave a Reply

Your email address will not be published.


*